青森二丁目@上水
28/1/2011 12:30

平時出街玩，好多時都係去油尖旺，灣仔銅鑼灣等潮流地帶。上水，一個唔正常嘅出街目的地，冇幾何會去。上水搵食，唔計集團霸權嘅連鎖餐廳，多數都係細細間傳統冰室、茶記、粥粉麵飯檔。

難得一間企理嘅日式料理，可愛嘅店名，令人諗起香甜嘅青森蘋果。

一個set lunch用你三十零四十蚊，有飲品、前菜加Main dish，食太刻薄都唔只呢個價。
拉麵唔算特別好味，湯底唔係特別濃，但叉燒都幾日式，起碼夠軟腍。
咖哩雞扒飯嘅咖哩味道香濃，應該選用左偏甜嘅咖哩醬，係幾日式咖哩嘅甜味。而雞扒煎得幾香脆，大大件，配咖哩一流。

鰻魚發燒友食日本野必點鰻魚壽司，呢度提供原條海鰻 ($26)。
雖然都預左係現成買貨，但選材都算唔話得。肉厚，醬汁一流。

四十幾蚊埋單，呢個價位喺北區黎講唔算平，但手揸呢個Budget喺九龍區搵日式料理，我估有九成機會食到垃圾。