星泰真味 @大埔
25/11/2011 13:30

是日午飯時間去左大埔中心，碰上一田百貨瘋狂勁減，人山人海得更瘋狂，搵食艱難。

香茅豬扒喇沙湯檬+凍奶茶 ($37)
湯粉比想像中大碗，材料亦唔少，豬扒竟然俾足三大塊，仲有其他配菜，幾足料呀!
豬扒浸入湯中，都食唔出係唔係香茅，但豬扒明顯煎過，外皮焦香。豬扒肥瘦適中，仲係肉帶骨，入口軟嫰，而且醃得入味，好香蜜糖同蒜味，味道甜甜地，好開胃。
湯底色水偏黃，椰香味道濃郁，少少辣度正好夠醒胃。最愛熱辣辣嘅喇沙湯底襯檬粉，粉撈湯一啖食，正! 檬粉煮得剛好，但略嫌剪得太過細碎。配菜仲有好多芽菜、豆卜、魚片同半隻熟蛋，豆卜吸收晒喇沙湯汁，一咬就唧晒入口，至係精髓所在。

午餐三十七蚊，正常質素，價錢合理，普普通通一間茶記嘅午餐都係咁上下。
睇埋下午茶餐牌，好似大約二十幾蚊有交易。
但睇番開飯網評，好多人都俾喊臉，似乎炒飯類型係地雷，可避則避。