富源咖哩王@荃灣
27/1/2011 14:30

大年初五仍然享受緊我嘅悠長假期，唔洗拜年，可以周圍去。見手頭上仲有幾張團購券，趁今日計劃下行程，用團購券食足一日。午餐先食個馬來咖哩，$22有一份再配飲品，勁平。呢間餐廳新開無耐，主打正宗星馬泰菜，是日提供四款咖哩選擇。

招牌星馬咖喱牛腩飯
份量十足，飯勁多，非常飽肚。咖哩一大碗，有六、七大件牛腩，相當足料。咖哩係馬來式，未食已經聞到咖哩香味。咖哩汁味道香濃，只有溫和嘅辣味，亦帶香甜嘅椰香味，入口有粉粉粒粒嘅感覺，相信加左唔少椰漿調配，並唔係開粉無味嘅芡汁咖哩，伴飯唔錯。 大大件牛腩肥瘦適中，帶點筋，似係坑腩部位，腍得黎又爽口，亦富牛味。可惜咖哩味欠奉，相信兩者係分別獨立製作，落單時先結合上碟，所以牛腩同咖哩汁係完全分離，並唔入味。