天上有地下牛

by | 4 月 6, 2012 | 港式, 灣仔, 茶餐廳, 麵食 | 0 comments

大利清湯腩@灣仔
6/4/2012 14:30

得到阿蘇讚到天上有地下無嘅老字號清湯腩,分店越開越多,竟然都有做團購嘅一日。$38套餐包括清湯腩或咖喱腩配粉麵飯,跟埋飲品,其實價錢唔係特別平,不過試下無妨。小店位於灣仔一條大街嘅後巷位置,唔留心真係搵唔到,人流亦唔多,可能就係做團購嘅主要原因。

清湯腩米、牛骨湯
先講下個牛骨湯,相信黎過呢度食野嘅朋友,一定知道小店牆上貼住唔少張,語帶恐嚇嘅說話「唔飲湯就係你嘅損失」。的確,個人覺得果碗牛骨湯係幾好飲嘅,湯底好清澈,一滴油都無,入口非常清甜順喉,帶有好香嘅牛骨味,雖然咁牛,但一啲都唔油膩,飲完亦唔覺口渴。電視節目介紹過,湯底不含味精,由多種藥材加二百多斤牛熬成,而且仲經過多重隔油,牛味更突出,真正原汁原味。

感覺上,清湯腩米嘅清湯真係比牛骨湯清,牛味稍弱,相信係溝淡左嘅原故。還好,牛腩份量都幾多,夠飽肚。落單時,無特選部位,所以都唔識分佢係咩位置。牛腩半肥瘦,少部份痴筋,肉質紋理非常細密。食落唔韌,非常軟腍,有入口即溶嘅感覺,完全唔痴牙,加埋筋位嘅爽脆質感,又軟又脆。牛腩肉味亦夠濃郁,夾雜左膻味同油脂味。小店話採用新鮮本地活牛,再用秘方調味燉煮足足十二小時,保證入味兼爽口鮮嫩咁話。唔理佢點整,但加埋個吸收晒清湯嘅米粉一齊食,我係收貨的。

咖喱腩飯
咖哩並非什麼印度式、什麼馬來式,只係典型港式咖喱,香辣平衡,無過份香料。只見咖哩上一層紅油,其實有啲驚,但聞落的確好香、好惹味。咖哩汁嘅辣味係可以接受,不至於食一啖,飲一啖水,個人認為辣得正好。沉浸喺咖哩汁嘅牛腩,份量都唔少。不過明顯地,呢碗牛腩比較肥,入口一樣腍滑入味,滲透住陣陣咖哩香。間中仲夾到兩、三件牛根,果種入口即溶、滑嘟嘟嘅感覺,真係引死人。不過可能係紅油壊事,實在過份油膩。另一樣要投訴就係,飯係一半熱、一半凍的,店方實在要留意下。

$38換來一個老字號牛腩體驗,感覺良好。未至於網友所講,出左名就差到無朋友,退步十丈遠,但價錢就繼續狂加。可能幫襯時並非繁忙時間,人少少,咁好彩可以分到正野。可惜,又未至於好食到,好似阿蘇所講嘅世間珍寶咁誇張。唔少網友都會將大利同附近幾間出名嘅清湯腩店比較,睇黎都要夾下行程,搵日去試埋先。

Archive

0 Comments

Submit a Comment

發佈留言必須填寫的電子郵件地址不會公開。 必填欄位標示為 *

麥當勞新春Hello Kitty套餐

馬鞍山 8/2/2025 11:00 黃金脆薯牛堡大大啖套餐 $46.5 超級靚Hello...

意樂

長沙灣 29/1/2025 18:00 下午茶 西西里鮮茄烤豬扒焗珍珠飯 $44 蛋黃煙肉卡邦尼長通粉 $46 一口炸雞芝士撈即食麵 $45 柚子蜜味芝麻烤雞翼配薯條 $36 馬鞍山...

希有湯煮

深圳中洲灣 19/1/2025 11:00...

WM 美味飯堂

WM Café & Bar @馬鞍山 12/1/2025 10:00 意式蕃茄湯餐肉粒通粉配牛乳炒蛋及丹麥多士 $39...

麗穎團水牛奶糖水舖

深圳翠竹 5/1/2025 14:00 點評禮券換得呢一份下午茶套餐(68元)。小店就喺翠竹站地鐵站旁邊,非常方便,兩層高,樓上座位非常闊落舒適。...