米G蓮腸粉

by | 12 月 2, 2011 | 太子, 港式 | 0 comments

第一腸粉@太子
2/12/2011 12:30
唐唐話深水埗最出名嘅美食係腸粉…?!唐唐講緊邊間腸粉真係唔知啦,只知道「米芝蓮」選中嘅係邊間腸粉專門店。就剛好喺佢上報當日,有機會一試。
之前喺筍仔網買左$10一張團購券,可以試一款腸粉,加送豆漿一杯。原本都打算呢個星期當做下午茶,去食埋佢。點知今朝早就見到各大報章介紹新一期「米芝蓮」中選名單,呢間小店就榜上有名,而且仲俾傳媒勁煲佢開業不足一年就上榜呀,金馬獎影后德嫻姐、柏高先生都係座上客呀咁。所以立即決定,即時決定,即日解決左呢張券,以免佢日後更出名,人龍湧現,想食都無得食。
十二點幾去到,好彩等位只需一分鐘。小店地方真係淺窄,舖仔細細坐到廿多人,避免不了背貼背嘅情況。一間小店獨賣腸粉,附加兩、三款粥品同蘿蔔糕等,都咪話唔博。
豆漿﹕ 幾清甜,有豆味。正好作為等待腸粉到來嘅良伴。
蜜汁叉燒拉腸﹕ 腸粉講不上晶瑩剔透,只可以隱約見到叉燒嘅橙紅色,單靠外型,已經覺得腸粉皮唔薄,的確。白白嘅腸粉皮入口帶黏性,並無想像中咁幼滑順口。人地話配方唔同坊間喎。但我欣賞佢夠米香,即使有相當厚度,仍然非常軟熟,可能各有各食法。內餡嘅叉燒,唔知係咪特意,切得比一般大塊,存在感更好。叉燒入口亦軟腍,肥瘦適中。不得不提,腸粉豉油本身已經非常好味,甜甜咸咸,正好增加腸粉嘅香味。
招牌第一拉腸﹕ 招牌腸內餡包括菜甫以及豬肉燥,好特別好創新嘅配搭。作為腸粉亦唔錯,菜甫有爽口粒粒嘅口感,加上濃郁惹味嘅肉燥,正係好台式風味嘅感覺,比一般叉燒腸更吸引。
所有腸粉都係即叫即造,即使入座唔洗等位,但等食都需要付上相當時間。全店滿座嘅情況下,等兩碟腸粉大約等左超過二十分鐘。但腸粉送上嘅時候,係熱辣辣,非常新鮮。團購價$10一碟加送豆漿,絕對無怨言。
小店開張無耐,已經數度加價,一碟腸粉由原先嘅$15,每次加兩蚊,已經加到今時今日嘅$19。當日佢仲未上米記榜之時,唔知道有幾大吸引力,令人願意俾張廿蚊紙齋食一碟腸粉。但相信由今日開始,小店人氣越勁,人龍自然越長,加價亦係理所當然嘅事,到時肯定廿蚊都唔夠埋單。好彩,早食早著。Yeah!

Archive

0 Comments

Submit a Comment

發佈留言必須填寫的電子郵件地址不會公開。

余香香牛腩煲

深圳園岭 26/5/2024 11:00 抽中大眾點評霸王餐,黎到筍崗附近嘅城中村。小店主打香港風情,裝修非常有香港情懷,連餐具都係香港地標。只係實在冷氣不足。...

億方城·牛腩牛雜煲

深圳龍華壹方天地 14/4/2024 12:00 抽中0元探店試食牛雜煲,位置比較遠。餐廳裝修環境有趣,好多霓虹燈,店面大,但生意似乎較淡靜。 人氣必點牛雜煲雙人套餐 (原148元)...

2024 復活節六人行台北之旅 第四日[4.2 點點心、泉發蜂蜜]

點點心台北微風廣場 30/3/2024 10:00 微風廣場有幾邊電梯上落,等十點正開門,遇岩前面嘅電梯係最早開,最快上到上層,好快就搵到早餐無目點點心。...

万世佳煲仔飯

美團外賣@海岸城 12/11/1023 18:00 包裝相當唔錯,只係一個膠袋,加上非常厚身嘅錫紙兜,摸上手直頭辣手,成個飯返到嚟香港仲暖。 其中一個係蠟腸排骨窩蛋煲仔飯...

馬鞍山親子餐廳

Whizbo Kids Cafe 25/7/2021 12:00 疫情期間太少出街玩。今日趁小公主生日,去親子餐廳盡興一下。預約左11:00 -...