韓點@紅磡
12/2/2012 13:30
紅磡有間全港首創韓國地道小食店，接受過無數雜誌、電視嘅專訪，個個食過都讚味道正宗，次次行過都堆滿人。見今日有時間，一於去排下隊。
韓式炒年糕 ($25)
廿五蚊一碗份量比想像中多，一打開就聞到好香嘅韓式甜辣醬味道。醬汁橙橙紅紅，紅色一點點應該係辣椒粉，仲有白芝麻點綴。年糕長條狀，睇落似港式豬腸粉，但每條都可以輕易分開，唔會癡埋一舊。
從電視節目得知，地道韓國小食都用左韓國入口嘅食材，保證原汁原味。年糕入口滑溜溜，食落好煙韌結實，越咬越有米香甜味。醬汁用左辣椒粉、辣椒醬、日本清酒同魚湯等煮成，煮得比較杰身，包裹住每一件年糕。整體感覺非常濃郁，味道以甜為主，食落有輕微酸味，亦慢慢滲出辣味，越食越刺激。椰菜片吸收晒醬汁，就好似食緊泡菜咁，超級入味。
年糕越食越覺辣味突出，間中需要飲水舒緩，但實在太過惹味，不禁一啖接一啖，怕辣都甘心頂硬上。兩人分食一份炒年糕，身體漸漸暖起黎，食完飽肚又溫暖，絕對係驅寒良品。
舖仔細細，專做韓式小食外賣，所以default包裝都係紙盒、膠叉。由韓國夫婦主理，老闆用韓文落單，由阿珠媽煮製食品，成個感覺真係好似身處韓國街頭。讚!
0 Comments