情迷旺角西門町

by | 2 月 5, 2012 | 台式, 旺角, 有話說 | 0 comments

西門町台灣麵食@旺角
5/2/2011 13:30

開飯網搜尋「旺角」+「台灣菜」,佔據搜尋榜首位置嘅,就係呢間有近三百五十個好評嘅台式料理小店。任何時間行過,店內最少坐足八成滿,晚飯時份,更會大排長龍。趁中午時份唔洗等位,一於重臨西門町嘆番餐。

廟口魯肉飯 ($31)
魯肉飯基本上係每枱客例點嘅名菜,一碗飯材料充足,有足量嘅魯肉,半隻滷蛋,仲有唔少蔬菜。魯肉係瘦肉同脂肪混合,配上香甜醬汁燉煮,非常濃郁。魯肉煮得腍,非常入味,隱約食到冬菇碎等材料,仲夾雜左粉粉軟軟嘅肥膏,入口其實有啲怕怕,但成個感覺完全唔油膩。醬汁充足、略為濕潤嘅魯肉配上爽口榨菜粒伴飯,真係非常惹味,不知不覺間已經完全清碗。強烈建議先將魯肉同飯伴勻,以免因為太好味,極速食晒啲餸,最後只淨低白飯,不過還好仲有隻滷蛋。

香辣牛筋新竹米粉 ($34)
一大碗睇見都驚喜,牛筋份量超多,相當於一般餐廳嘅兩倍份量。所謂嘅香辣,並唔算太辣,但香氣十足,味道係醒胃、惹味嘅甜辣味。牛筋食落軟韌適中,大大件亦燘得夠腍身,但仍不失爽口嘅膠質感。而新竹米粉非常幼細、煙韌,配濃味牛筋一流。

網皮芋蓉卷 ($19,優惠價$9)
九蚊雞一客,有三件芋蓉卷,真係幾抵。網皮炸得好香脆,勝在夠乾身、唔油膩。網皮低下包住芋蓉,仲有些少疑似豬肉碎同冬菇粒等,味道剛好,口感粉粉腍腍。芋蓉卷仲可以沾一下酸甜辣醬,更加好味。

星期日午市時間仍有供應抵食套餐,一款飯或麵只需三十零蚊,仲附送冷熱飲品一杯,超抵! 小店仲提供追加小食優惠,大約俾多十元、八塊就可以加配一款小食,四十蚊埋單,已經可以滿足離開。

當天發生左小插曲,印象深刻,但疑似老闆態度十個抵讚,應記。
落單阿姐似乎係新手,點菜覆單論論盡盡,及後見到手上嘅埋單紙,無啦啦多左三大蚊。疑似老闆問清楚後,樂意改單,並送上兩句唔好意思。後來,一碗新竹米粉竟然變成擔擔麵,先知道問題所在。原來阿姐口頭覆單正確,但手寫單出錯,所以亦順理成章出現左擔擔麵底加三蚊。疑似老闆立即換上一碗正確又新鮮嘅香辣牛筋新竹米粉,前前後後,一共講左五句唔好意思,同三次對唔住,搞到我地都真係唔好意思,麻煩晒。

雜誌盛讚此店食品非常正宗好味,但老闆並非地道台灣人,而係確確實實嘅香港人。當日所見,疑似老闆先生事事親力親為,非常落力,待客有禮不在話下,亦感覺到果種威嚴嘅氣派。隱約聽過疑似老闆提點員工,言語間無帶一點責罵,只係好聲好氣勸勉員工要盡心盡力,相信阿姐們亦心服口服。

多得頭條本搵食指南,引領我去西門町食好野,無團購之下,要搵平靚正嘅,呢度係一個不錯嘅選擇。

Archive

0 Comments

Submit a Comment

發佈留言必須填寫的電子郵件地址不會公開。

喜茶

水貝KK Time 3/12/2023 今日黎到水貝KK Time,就係商場一樓見到喜茶。見天氣咁凍,叫杯熱辣辣嘅飲品先。 差不多等左三十分鐘,一杯熱辣辣奶茶就送上。 熱芋圓牛乳茶 15元...

嚐仙

26/11/2023 17:00 荃灣 招牌燒仙草 $50 紫米紅豆湯 $48

明記潮鍋

旺角 19/11/2023 12:00 餐廳就係旺角一座唔顯眼嘅商業大廈,搵地點都用上一些時間。餐廳相當大,但中午人客稀少,真係唔知佢點做生意。 午市特惠商務套餐 (每位$198)...

茶力的小怪獸

深圳萬象天地 12/11/2023 12:30 卡士豆花珍珠奶茶 26元...

春水堂

沙田 9/9/2023 11:30