荃灣 26/11/2023 18:00

菜館座落荃灣某大街，要行樓梯上一層樓。菜館係傳統舊式菜館，衛生環境不太理想，每枱椅都貼近，幾乎背靠背，實在唔太適合帶小孩。如果唔係點評抽中$400現金券，都非常確定係唔會選擇呢D餐廳。

滷水鵝 $148﹕大大碟，賣相吸引，滷水鵝配上滷豆腐。滷水鵝啖啖肉，肉質嫰滑，都相當入味，特別要加上酸醋更加惹味。豆腐都好腍滑。

蠔仔肉碎粥 (小) $78﹕估唔到小碗都咁大碗。蠔仔相當多，隻隻都大大粒漲卜卜，非常鮮甜。配料仲有肉碎，方魚等，湯底幾清甜味道不錯。

潮州炒麵線 $118﹕份量大，潮州麵線係扁身麵線，配上蝦、鮮魷、蛋、芽菜等，醬料咸鮮味足。

超大杯檸檬茶 $38﹕的確好大杯，茶底濃郁，檸檬夠晒多，非常解渴。

環境唔討好，但食物質素高，菜色相當地道正宗。價錢合理，成年人聚餐可以考慮。