釜山炸雞批薩

馬鞍山 14/10/2023 18:00

今日買外賣晚餐，小店就喺馬鞍山後街一個唔起眼嘅角落，一入門口就相當韓國感覺，原來老闆同廚師都係韓國人。效率非常高，外賣只需等15分鐘，兩大袋，分量十足嘅外賣新鮮整好。外賣包裝非常之好，仲有手套附上。打開包裝，實在太豐富，太澎湃啦！

五味炸雞 $239

主打韓國炸雞當然要試吓，呢一個五味炸雞，就啱晒選擇困難症嘅人，一次過試齊五種唔同口味。先食原味，外皮脆卜卜，中間仲有肉汁，唔油膩。炸雞仲有加左洋蔥蛋黃醬，洋蔥味濃帶微酸。蜜糖芥末醬更加重口味。甜辣醬好杰身，帶微辣好開胃。個人最鍾意雙重芝味，芝士粉舖滿外皮，好香好甜，芝味十足。

韓式烤肉PIZZA $169

首次試韓式Pizza，賣相好靚仲好大個，餅底有厚度，芝士超多做到拉絲效果，材料豐富，主要係肉粒、火腿粒等，醬汁係甜甜嘅韓式燒烤醬，味道不錯。

炸醬麵 $68

炸醬麵醬汁味道帶甜，配料有薯仔肉碎等，麵條粗粗地有啲似烏冬，口感煙韌，每條麵條都沾上醬汁。

芝士蛋卷 $108

超大份嘅蛋卷，煎得好靚好工整，略為實淨厚身嘅蛋卷，中層夾左芝士，加少少番茄醬美味十足。

估唔到係馬鞍山收埋左一間咁正宗嘅韓國餐廳。味道好，份量勁多。實在係外賣Party Food好選擇。