熊貓燙火鍋

熊貓燙火鍋

寶安壹方城 13/2/2024 11:00

想試呢間熊貓湯火鍋好耐,但見分店比較細間,座位一般,最後嚟到壹方城呢一間大啲面,一家人可以坐完枱,相當闊落。門口有可愛嘅大熊貓公仔同小朋友影相,仲有遊戲機可以解悶。職員送上兩隻小熊貓髮夾,小朋友開心到不得了。

不同角落都佈滿着大大小小嘅熊貓,連餐具都係熊貓擺設,實在太可愛。

元氣大滿足和牛三人餐 389元

經典三味熊貓鍋湯底有清雞湯味道相當鮮甜,另有味道微酸似有加上蕃茄湯底,仲有四川麻辣湯底。

招牌9M雪花和牛、6M雪花和牛:估唔到兩款肥牛質素相當高,油花分布靚,入口非常之嫩滑,牛味濃郁。

毛肚、鴨血、冰封鮮鴨腸:用冰封住實在浮誇,鴨腸煮完之後好爽口。

香菜鮮肉滑:調味不錯,爽口彈牙。

仲有多款蔬菜,包括黃金針菇、貢菜、黃豆香千張、娃娃菜、冬瓜。

手工扯面職員姐姐將麵條拉薄,再幫你放入火鍋,麵條米味幾香。另外單點一份扯面加3.9元。

自助醬料有現榨芝麻油同現磨芝麻醬,芝麻味幾香,好幼滑,配牛肉一流。另外特別鍾意沙茶醬,甜甜地,花生味香。

免費自助銀耳雪梨湯,清甜潤喉,無限任加。

浪漫雲頂草莓乾果冰粉杯 9.9元、熊貓爆爆草莓冰粉杯 9.9元。賣相實在太可愛,每隻杯都有可愛的熊貓。草莓冰粉唔太甜,相當之滑溜,一杯加上忌廉,好幼滑。另一杯加咗爆爆珠。

餐廳環境吸引,職員都想當親切熱情,食物新鮮質素高,雖然價錢在深圳消費實在唔平,但係都相當值得。

白玉串城 朝鲜族烤串

白玉串城 朝鲜族烤串

深圳KKONe 28/1/2024 12:00

期待久,終於嚟到人氣甚高嘅白玉串城。好彩喺KKone商場內開咗新店,環境比較舒適,方便照顧小朋友,被安排坐一間包房自成一角,非常舒服。

今日叫咗點評招牌烤串雙人套餐 235元

白玉串、羊肉串、精品牛肉串、伊比利亞黑豬梅花肉串、雞脆骨各5串。所有肉類放喺自助烤爐上邊,睇住佢慢慢轉好治癒。職員中周時留意住你串燒嘅情況,提示你可以食得。

各樣肉類都相當唔錯,肉質腍滑,肥瘦適中,肉味濃,調味適中,個人最鍾意羊肉串同埋雞脆骨。

自行加配調味有三款,比較鍾意芝麻粉孜然粉。另外有一款係甜辣豆瓣醬。仲有就係香辣味粉。

前菜包括老醋花生米,甜甜地帶微酸。仲有爽口黃瓜。

錫紙娃娃菜係廚房整好咗嘅製成品,蒜蓉味極濃,亦有牛油香,菜煮得好腍,非常啱口味。

煮食仲有海鮮炒飯,分量相當多,有唔少蝦仁、蟹柳等海鮮配料,炒飯調味適中。

飲品揀咗竹蔗茅根馬蹄飲,清涼唔太甜, 正好解膩。

另外自己加配幾款,包括

墨魚腸9元、爆汁黑豚純肉腸9元:香腸脆皮,有肉汁。

鰻魚串9元:兩件鰻魚肉質肥美,調味適中,不錯。

包包馬蹄整顆梨25元:一桶裝整個燉雪梨,賣相吸引,味道非常清甜滋潤。

牛小灶牛杂煲

牛小灶牛杂煲

外賣@深圳水貝IBC 3/12/2023 18:00

想食依個牛什煲好耐,今日行過見到即場買外賣打包返香港。

牛腩牛雜煲美團價120元

打包非常仔細,一個厚身嘅錫紙兜仲係全密封包裝,拎上手仲係暖笠笠。打開包裝,以為下邊會墊咗好多配菜,點知牛腩同牛雜真係多到見底。醬料係柱侯將味道,牛腩啖啖肉,煮得非常諗,非常入味。仲有角色牛雜,個人最鍾意嘅牛筋都係非常段落,仲有牛肚、牛腸等等,每一款牛味非常濃郁,而且煮得好入味。配菜仲有麵筋,蘿蔔等等,非常豐富,自行加配麵食非常正。

喜德家蝦仁水餃

喜德家蝦仁水餃

深圳水貝IBC 3/12/2023 17:00

喜三鮮水餃 29 :水餃非常飽滿,被唔算十分薄,但係幾煙靭,本身味道唔錯。

西芹鮮肉水餃 26: 內餡飽滿,材料多。

香滷肉丸子 9: 一般般。

紅豆沙丸子 10: 估唔到係芝麻湯圓,味道不錯,有驚喜。可惜紅豆沙唔夠熱。

明記海鮮潮州菜館

明記海鮮潮州菜館

荃灣 26/11/2023 18:00

菜館座落荃灣某大街,要行樓梯上一層樓。菜館係傳統舊式菜館,衛生環境不太理想,每枱椅都貼近,幾乎背靠背,實在唔太適合帶小孩。如果唔係點評抽中$400現金券,都非常確定係唔會選擇呢D餐廳。

滷水鵝 $148﹕大大碟,賣相吸引,滷水鵝配上滷豆腐。滷水鵝啖啖肉,肉質嫰滑,都相當入味,特別要加上酸醋更加惹味。豆腐都好腍滑。

蠔仔肉碎粥 (小) $78﹕估唔到小碗都咁大碗。蠔仔相當多,隻隻都大大粒漲卜卜,非常鮮甜。配料仲有肉碎,方魚等,湯底幾清甜味道不錯。

潮州炒麵線 $118﹕份量大,潮州麵線係扁身麵線,配上蝦、鮮魷、蛋、芽菜等,醬料咸鮮味足。

超大杯檸檬茶 $38﹕的確好大杯,茶底濃郁,檸檬夠晒多,非常解渴。

環境唔討好,但食物質素高,菜色相當地道正宗。價錢合理,成年人聚餐可以考慮。

明記潮鍋

明記潮鍋

旺角 19/11/2023 12:00

餐廳就係旺角一座唔顯眼嘅商業大廈,搵地點都用上一些時間。餐廳相當大,但中午人客稀少,真係唔知佢點做生意。

午市特惠商務套餐 (每位$198)

因為我地唔太好海鮮,揀左兩份輕宜嘅套餐。揀左蘋果雪梨湯底,雞湯底配上蘋果雪梨,相當滋潤。出面仲有自選醬料,遇上選擇困難症,款式實在太多。兩份火鍋材料送上實在太吸引,擺盆勁靚,值得打卡。材料都非常多,鮑魚、基圍蝦、青口、鮮魷幾分鐘食得,相當新鮮彈牙。魚俾左白膳更驚喜,非常肥美鮮甜。肉類有安格斯牛肉同豚肉,少少地幾片,但係肉質相當腍滑,肉味香濃。各式潮州丸就相當豐富,首推彈牙多汁手打牛丸真係非常好味。最後仲揀左出前一丁兩個,配上新鮮蔬菜,連小朋友都岩食。隨餐有自家製蘋果雪梨水,姐姐仲送我地每人一杯牛奶雪花冰。

另外加配牛胸爽 ($88),白色一片片絕對唔似肉類,原來係牛肉筋膜,煙煙韌韌,牛膻味勁香,估唔到咁好食。

營養粟米餃 ($40)、鮮肉野菌餃 ($40)﹕雖然餃子得小小四粒,但係超大隻,皮唔算厚,內餡澎湃到滿漏,味道香甜,小朋友最愛。

我地平常唔太好海鮮,又唔會無啦啦食火鍋,試過呢餐覺得非常驚喜。所有材料都非常新鮮,配搭得宜。餐廳空間夠大坐得舒服,服務亦相當好,有BB椅,值得推介。

大眾點評抽到香港免費試,價值$600。埋單最後$620,補少少錢絕對值得。