旺角 9/5/2026 15:00
包裝賣相靚，試咗幾款人氣甜品，又靚又好味。
桃膠椰凍 $42﹕樽仔太可愛，感覺幾清新。椰凍本身質感滑溜，淡淡椰香，味道唔太甜，食落好舒服。桃膠黏滑，蜜味清甜，仲加左杞子，味道清甜，又夠滋潤。
脆皮開心果大福 $32﹕ 外層係脆皮朱古力，一咬落去先感受到香脆口感，之後先到麻糬外皮嘅煙韌，層次分明，內餡仲非常豐富，入面嘅開心果餡香氣好突出，堅果味濃郁之餘又帶自然油香，甜度控制得幾好，唔會蓋過開心果本身嘅香味。
麻糬抹茶味配海鹽芝士奶蓋醬及開心果碎 $52﹕抹茶麻糬本身煙韌柔軟，茶味濃郁微微甘甜。配上海鹽芝士奶蓋醬鹹鹹甜甜，令整體口感更幼滑。最後開心果碎新鮮香脆，多咗堅果香同粒粒口感，味道更加豐富。
西貢 3/5/2026 14:30
西貢海鮮街附近發現呢間非常特別嘅Cafe，由門外到室內放滿店主嘅珍藏，藏品多到好似博物館咁。餐廳整體感覺輕鬆舒服，食物賣相吸引之餘，味道亦有誠意。
All Day Breakfast $118﹕賣相相當吸睛，豐富材料整齊上碟，多士烘得金黃，火腿、煙肉煎得香口，鹹香味濃﹔芝士腸、德國腸腸衣香脆，肉汁豐富，炒蛋份量十足，嫩滑濕潤。多士烘得非常香脆，仲有鮮甜火龍果，真係非常豐富。
田螺焗薯蓉 $48﹕表面焗到微微金黃，薯蓉入口綿密，田螺彈牙爽口，陣陣香草牛油香氣。
愛爾蘭海鹽咖啡 $37﹕表現幾出色。咖啡香氣明顯，入口先感受到咖啡本身嘅醇厚，再慢慢帶出海鹽奶蓋嘅輕鹹味，鹹甜平衡做得唔錯。海鹽元素令咖啡味道更立體，唔會只得苦或者甜，反而多咗份順滑同層次感。
士多啤梨奶昔 $37，就係另一種完全唔同風格嘅享受。奶昔質感幼滑濃厚，士多啤梨味自然香甜，帶少少果酸，令整體唔會過膩。冰凍口感好清爽，飲落特別解膩，
自選意式薄脆薄餅 $128﹕材料自選，餅底焗脆脆，芝士超足料，拉絲效果討好，鹹香濃郁，配上粟米嘅清甜，煙三文魚本身油香細膩，帶少少煙燻味，豐富。
焦糖蜜桃新地 $78﹕ 雪糕入口幼滑，雲尼拿味香甜，唔會太膩。蜜桃果肉甜甜地，焦糖加上粟米片就最夾，唔止靚，仲好好食，夠晒清涼。
西貢 3/5/2026 12:00
Lobster Mac & Cheese $248: 意粉表面鋪滿芝士，焗至金黃色，仲有原隻龍蝦放係面，賣相夠豪華。龍蝦份量唔少，啖啖肉，非肉質鮮甜彈牙。芝士份量足，勁拉絲，味道咸香濃郁。芝士嘅鹹香同龍蝦嘅鮮味好夾。
Portobello Beef Burger $148: 大大件漢堡勁澎湃，層層疊起好有份量。大啡菇本身厚身又多汁，帶住淡淡菇香，配上煎得金黃微焦嘅牛肉漢堡，牛味香濃，肉汁豐富。麵包本身都好鬆軟，將所有材料夾埋一齊，同埋酸酸甜甜嘅醬汁，好味唔會太油膩。仲有薯條炸到金黃香脆，熱辣辣上枱，飽足!
Peanut Butter Banana Waffle $128: 華夫烤得幾靚，外層微脆，入面仲保持鬆軟口感。上面配上香濃花生醬，同香蕉嘅天然甜味非常夾，花生香氣厚實，香蕉香甜，細細粒嘅朱古力布朗尼味道勁香濃，加埋雲呢拿雪糕，正！
何文田 2/5/2026 12:30
街坊小店價錢親民，性價比超高！
朱古力心太軟 $12: 賣相已經很吸引，切開時中間朱古力漿慢慢流出，視覺效果滿分。外層蛋糕口感鬆軟，帶少少濕潤感，朱古力味香濃但不會過甜，入口順滑。
花生糯米茲 $6 大大粒超抵食！外皮煙韌軟糯，內餡花生爆多，味道不太甜。
岩燒芝士蛋糕 $10: 芝士味夠濃，表面輕輕烤過後多了一層焦香，蛋糕質地綿密細滑。
朱古力麻糬波波 $11/3: 外層輕脆，入面煙韌有咬口，大大粒，有朱古力粒，抵食。
朱古力蛋糕 $24: 大大條，蛋糕鬆軟細緻，朱古力香濃，甜度適中，中間仲有粒粒朱古力碎，足料。
旺角 24/4/2026 17:30
試左幾款產品，仲有新出品，每一款都充滿驚喜。
紅棗貝果$28 口感極之煙韌，麵團揉合紅棗嘅清甜，淡淡棗香，仲有好棗肉，味道微甜，夠健康。
醇滑芝士撻$24 有金黃色酥皮，十級酥脆，充滿濃郁牛油香。芝士餡爆晒漿!
開心果酥皮窩夫 $34 極香脆， 中間係開心果醬同碎粒，堅果味勁香。
開心果牛角酥 $32 外皮酥香，面頭係開心果脆皮，牛角酥好鬆化。
旺角新出聯乘再睡5分鐘，四季桃氣迷你菠蘿包幾吸引，下次試試。
佐敦逸東酒店 19/4/2026 14:00
佐敦逸東酒店 food court好多野食，呢間牛響度套餐好抵食，套餐包飲茶同小食/甜品，幾吸引!
炸豬扒、豬軟骨湯麵 $78﹕呢款組合真係滿足食肉獸，炸豬扒外層炸到金黃酥脆，豬軟骨煮到夠晒腍，豬軟骨湯麵湯底都幾香。
五花豚腩片、豬頸肉蔥油拌麵 $73﹕五花豚腩片肥瘦相間，豬頸煎到微微焦香。拌麵用蔥油調味，味道勁咸香，非常惹味。
套餐加$7升級冷泡茶，白桃冷泡茶茶底帶有淡淡嘅茶香，配埋白桃嘅甜香，清新又解渴。青蘋果冷泡茶就更加酸甜，茶底帶有微微嘅澀感，配埋青蘋果嘅果香，清涼！蒜泥白肉肥瘦比例啱啱好，蒜泥醬汁勁蒜，味道濃郁，鹹香加辣，個人黎講就太過刺激。和牛甜品幾特別，整成和牛造型，士多啤梨味都幾香。
沙茶鮮牛、沙茶金錢肚蔥油拌麵 $78﹕抵食套餐一碗麵、包開胃前菜同汽水! 沙茶鮮牛真係惹味到爆，牛肉肉質鮮嫩滑溜，沙茶醬濃郁甜香微辣，超惹味。金錢肚炆到入晒味，爽口又多汁。底下嘅蔥油拌麵麵條煙韌彈牙，拌勻之後每一條麵都充滿蔥油同豉油香。蔥油夠晒咸香，食到舔舔脷。隨餐送小食，麻油雲耳滿滿麻油香，口感爽脆，非常開胃。最後飲埋杯可樂就非常滿足。
牛雜淨食 $55﹕之後揀左幾款小食，街頭經典牛雜淨食，一碗有齊牛腸、牛肚、牛肺同牛膀，非常足料。每一款都處理得好乾淨，牛雜炆到軟腍入味，充滿脂香得嚟又帶點嚼勁。最正嘅仲有墊底嘅白蘿蔔，吸晒牛骨湯底精華，清甜多汁。
炸芝士熔岩蝦球 $38﹕外面金黃酥脆，入面係超級彈牙鮮甜嘅蝦膠，口感十足，最驚喜嘅係中間係半溶芝士餡，熱辣辣爆晒漿，蝦肉嘅同芝士鹹香非常夾，極邪惡超好食。
炸地瓜球 $26﹕地瓜球炸得唔錯，唔會覺得油膩，外層酥脆，中間係煙韌Q彈嘅麻糬口感，紫心地瓜甜度啱啱好。
