漢陽廷自助烤肉火鍋
深圳中航城 4/1/2026 12:00
呢度主打韓式烤肉放題，食材選擇極之豐富，好滿足。肉類選擇多，五花肉、秘製肥牛、厚切五花肉放上高溫烤盤，發出誘人嘅滋滋聲響。燒到外層金黃焦脆，逼出多餘油脂，咬落去油香四溢，口感爽脆彈牙。肉類都醃得極入味，韓式微甜醬香，肉質軟腍多汁﹔仲有幾款海鮮類。
除咗高質烤肉，自助吧仲有好多款熟食、涼拌菜、壽司賣相都唔錯。最緊要係甜品、雪糕、飲品都係任食。
食物選擇多，都算幾新鮮，味道還好。以成人99元一位當食餐午餐係非常滿足。
西小排
深圳中航城君尚 13/7/2025 19:00
安格斯谷飼西冷100G 意麵雞蛋水果 55.8元﹕牛排切片鋪於意麵上，仲有煎蛋同蔬菜，賣相不錯。安格斯谷飼西冷牛排，肉質細嫩多汁，脂肪比例適中，外層焦香，內裡鮮嫩，有濃郁牛肉香氣。意麵煮至彈牙，搭配以黑椒、蒜香煮製。
果木雪花牛排100G 45.8元﹕雪花分布均勻嘅牛排，肉質細膩多汁，口感更爽滑。
德式烤腸2.8﹕烤腸腸衣外脆，保留了肉質鮮嫩同彈性。中間多汁，加配價好抵食。
艾特九牛 原切雪花牛排館
深圳上梅林 26/1/2025 11:00
二人餐 92元
眼肉牛排海苔拌飯：以鐵板送上，賣相不錯。眼肉部位本身就帶著豐富嘅油花，煎到恰到好處七分熟熟，表面微微焦香，切下去斷面還帶著粉紅色。外層焦脆，內裡仲保留住肉汁，油香四溢，牛味都幾濃，輕輕加少少鹽都幾好味味。鍾意刺激口味仲可以加一啲孜然粉，辣辣地更加惹味。配上海苔飯，同牛排都幾夾。配菜仲有粟米、洋蔥等等。
雞胸肉雞扒配手工肉醬意麵：雞扒外層煎得金黃酥香，切開雞扒見肉質都幾嫩，仲有肉汁。加上手工肉醬意麵，滿滿濃郁番茄肉醬，微酸微甜的唔太膩。
兒童餐 19.9元
兒童餐都幾豐富，香腸外皮脆脆，味道香甜；仲有肉醬意麵、煎雞蛋同沙律，對小朋友嚟講已相當飽足。
大食代豐谷鐵板
深圳深業上城 22/12/2024 18:00
鐵板黑椒牛柳粒炒飯 45元
份量不少，牛柳粒粒非常多，都有牛味，但係口感略為實淨。炒飯粒粒分明，仲有好多生菜，洋蔥燉，黑椒味香，非常有鑊氣。隨餐奉送一碗海帶湯，仲有一碟勁辣辣椒醬。
三木屋
27/10/2024 12:30
科學園發現呢間非常抵食嘅食料理，出品仲相當不錯，小店採用自助形式，堂食座位都非常闊落。人流唔多，好適合過嚟午餐。
黑豚扒雞扒石板燒定食 $98
非常澎湃嘅午餐，大大件黑豚扒，大大件雞扒放喺鐵板上燒，兩塊扒煎到黃金香脆，外皮脆脆，雞扒仲啖啖肉。黑豚扒非常嫩滑，味道幾甜，估唔到咁好食跟餐附上芝麻醬沙律，半隻溏心蛋，仲有飲品，真係非常抵食。
豬軟骨味玉豚骨湯拉麵 $60
湯底甜甜，拉麵都幾順滑亦掛湯，豬軟骨份量唔少，相當入味，軟骨又夠晒腍。味玉賣相不錯，半熟溏心，醬油味香，非常不錯。有齊木耳、魚板的配料，仲免費配麵豉湯，相當抵食。
極品雪花肥牛味玉黑蒜油拉麵 $68
賣相不錯，湯底有黑蒜油香，入口有豬骨湯味甜甜的，黑蒜油味道淡淡。肥牛非常腍滑，肥瘦適中。配上熱白桃烏龍茶，幾香甜濃味。
V Cafe
深圳皇庭V酒店 13/10/2024 12:00
福田區酒店，26樓視野一流，環境甚佳。美食應有盡有，最特別有鐵板燒、自選材料一人火鍋。甜品都靚，味道唔錯。人均$200多，兒童只需半價，抵食。
