by admin 7 月 28, 2025 | Blog , 尖沙咀 , 樓上cafe , 甜品 , 西餐
尖沙咀 28/7/2025 13:00
Bookmark左呢間尖沙咀超多好評嘅西餐好耐，到暑假真係有時間同老公拍拖仔。距離尖沙咀地鐵站不遠處，一座Service Apartment樓上，所以環境更加清靜。餐廳佈置簡潔但高格調，非常舒適。特登揀午餐來，因為套餐相當抵食。Lunch Menu 本身已包括餐湯同及汽水。份量唔算太多，想試多款，所以叫左三個餐。
是日餐湯係蘑菇湯，有顆粒感，真材實材。菇菌味香濃，亦帶奶香，不錯。
M4+澳洲和牛脊肉配薯條 $218﹕賣相精緻，M4+屬於優質和牛級別。牛肉嘅熟度控制精准，要求嘅五成熟都做到，牛肉仍帶粉紅色，可見細密嘅紋路。牛脊肉真係非常柔嫩，濃郁嘅牛肉香氣，既濃厚又唔覺油膩，而且非常多汁。薯條炸得外酥內軟。
燒烤醬燴羊膝配焗薯蓉 $188﹕非常澎湃，份量十足，一隻羊膝呈現眼前。羊膝燉煮到肉質非常嫰，好輕易就可以用叉子𠝹開。每啖都食到羊肉天然嘅味道，而且肉汁豐富。搭配燒烤醬入晒味，甜咸平衡得恰到好處，仲帶少許煙燻氣息。薯蓉超級滑，入口即化，薯味香濃。兩煮非常調和，滿足!
脆皮豬腩件珍珠麵配日式洋蔥汁 $98﹕擺盤賣相實在太靚，估唔到平平無其嘅豬腩肉都可以升級到呢個格調。幾件豬腩整齊排列，金黃酥脆嘅脆皮、肥瘦相間嘅豬肉大巴士實在太吸引。成件事嘅重點一定係脆到索一聲嘅脆皮，而肉質係非常嫩滑多汁，油份適中，毫無油膩嘅負擔。日式洋蔥汁絕對係靈魂所在，洋蔥煮得透，本身洋蔥嘅清甜味加上日式醬汁嘅香甜，以及芝士碎嘅咸香，同豬腩肉好配合，幾片帶酸味嘅醬菜讓菜色更加清爽，襯托出豬腩嘅濃厚鮮甜，完美收筆。珍珠麵圓圓細細粒，口感彈牙，用墨魚汁炒過，帶海洋咸香味，為餐點結尾留下飽足感。
by admin 7 月 26, 2025 | Blog , 旺角 , 樓上cafe , 泰國菜
旺角 26/7/2025 13:30
旺角難得搵到價格非常貼地嘅泰國菜餐廳，環境舒適，午市套餐仲包括飲品，份量充足，非常抵食。
今日仲送上冬陰功湯，蕃茄味勁香濃，搭配泰式醬料，香茅、青檸葉等，帶輕微辣味，真係超開胃。湯內面仲有車厘茄同秀珍菇，真材實料。
牛肉香葉炒公仔麵 $58﹕香氣滿滿，味道非常濃郁，牛肉、蔬菜等配料都非常多，牛肉煎炒到恰到好處，夠晒腍。粟米仔爽脆香甜，調味方面加左唔少香葉，亦加左魚露，咸香味突出。公仔麵炒得夠鑊氣，仍保持彈性口感，非常不錯。
海南雞拼豬手飯 $70﹕賣相靚仔，集海南雞同泰式豬手於一碟，一次過試晒兩款。雞皮油亮，肉質滑嫩，肥瘦適中，就算係雞胸部位都唔會感覺乾柴，肉味鮮甜。泰式豬手經過長時間燉煮，豬皮都煮到軟腍，入口即化，肉質都幾腍滑，醬汁味道帶甜，送飯一流。
加$10升級三色椰汁冰﹕大熱天時飲番杯冰凍特飲。白色嘅椰汁冰底清爽微甜，椰香十足，中間加左三款配料，有白色、綠色、粉紅色，口感滑滑類似啫喱的物體，咬開中間又脆脆地好似馬蹄咁，非常好味。
加$10升級珍多冰﹕東南亞嘅經典甜品，呢款椰香味更加濃郁，亦帶奶香味，珍多條口感Q彈爽滑，甜度適中，清涼解暑。
旺角 6/4/2025 12:30
餐廳環境充滿住濃厚嘅泰式風情，一踏入門口已經感覺東南亞色。長梳化座椅舒適，仲有一片大玻璃睇到窗外風景，好舒服。
午市套餐非常抵食，送埋飲品都係$4-50。
火車頭炒飯 $48
泰式金邊粉 $55
豬頸肉炒貴刁 $58
值得一提，加$10可以轉飲泰式奶茶。
by admin 5 月 10, 2025 | Blog , 樓上cafe , 甜品 , 西餐 , 觀塘
觀塘 10/5/2025 14:30
觀塘工廠大樓上面搵到一間勁多好評嘅Cafe，入座主場隔離間房，私隱度高，大大張梳化可以輕鬆chill吓，好似一個神秘嘅基地。
照燒鰻魚滑蛋漢堡 $118﹕賣相勁靚，勁澎湃，原條鰻魚做到漢堡有夠豪華。漢堡包脆卜卜，牛油味好香。全條鰻魚實淨有口感，照燒醬非常濃甜，有微微香烤嘅氣味，略嫌未夠嫩滑，同埋多左少少骨。至於滑蛋真係非常creamy，入口即溶，蛋汁豐富，吸收晒鰻魚汁嘅甜味，兩者實在太夾。配菜仲有新鮮脆卜卜嘅生菜同鮮甜嘅番茄，略加少少帶酸嘅沙律醬，正正為漢堡增添清爽感。整體味道不錯，啖啖滿足感。薯條新鮮即炸，口感綿密，絕對係食漢堡必備。
肉桂蘋果批配雪糕 $48﹕賣相非常吸引，一上枱已經聞到好香嘅肉桂味。外層嘅批皮比較濕潤，上面整體舖滿一片片蘋果，煮熟左嘅蘋果柔軟得黎仍保留輕微爽脆，每一啖都滲透住肉桂嘅濃香，味道微甜微酸。最後配上雲呢拿雪糕來一個冰火交融。雪糕滑溜香濃，奶香味突出，同蘋果批嘅味道完全夾。雪糕慢慢融化將兩者溝埋一齊食，幸福滿瀉！
雪糕窩夫 $42﹕啱啱出爐嗰種香味已經夠迷人，窩夫烤到外皮金黃脆卜卜，入口鬆化，內層柔軟，帶啖啖香濃牛油味，最鍾意佢甜度夠，非常不錯。加上雲呢拿雪糕加添一份奶香。淋上少少糖漿同朱古力醬又靚又好味。
亞芺佳朵 $29﹕半價可以加配飲品，廿幾蚊一杯又靚又勁高質嘅手工咖啡。大大杯雲尼拿雪糕伴意大利濃縮咖啡。將熱騰騰嘅咖啡淋入雪糕，雪糕慢慢融化，咖啡香味慢慢散到發出黎。本身咖啡濃郁香濃得黎帶點微苦，雲呢嗱雪糕嘅奶香平衡咗咖啡微微嘅苦澀味，咖啡慢慢變得柔和，最後就係鮮奶咖啡嘅口味，每啖都好滿足。
豐富嘅一餐，不過二百幾蚊，咸點甜點品質都相當高，又坐得舒服，超喜歡!
by admin 4 月 27, 2025 | Blog , 新蒲崗 , 日式料理 , 樓上cafe , 甜品 , 西餐 , 飲品 , 麵包
新蒲崗 27/4/2025 18:00
慢煮手撕豬腩窩夫三文治 $116
新蒲崗人氣餐廳「窩子」嘅特色菜之一，單係睇賣相已經夠吸睛，實在太澎湃，材料勁豐富。金黃酥脆嘅窩夫係底部主角，邊緣輕微帶焦，散發牛油同蛋香，上面放上新鮮生菜同番茄外，再鋪滿手撕豬腩肉，加上一片烤得微焦嘅芝士，份量十足! 豬腩肉絲香嫩，煮得夠晒入味，味道酸酸甜甜，非常開胃。配搭嘅窩夫焗至金黃，中間非常鬆軟帶韌性，可惜蛋味略為不足。但確實有驚喜。
日式海鮮大阪燒酥皮薄餅 $188
賣相實在吸引，材料多到滿瀉。以日式大阪燒加上酥皮做成薄餅，的確有創意。直徑足足8寸酥皮，底層嘅酥皮薄餅脆到不得了，入口時酥香滿溢。薄餅材料呈現大阪燒嘅元素，滿滿嘅海鮮如魷魚仔、帶子粒同蜆肉，相當足料，一絲絲嘅紅生薑係日和風味來源。加上濃郁香甜嘅大阪燒醬同蛋黃醬，仲有會舞動嘅柴魚片，脆口紫菜碎，確確實實嘅大阪燒! 可惜酥皮同海鮮有啲分離散碎，食起來比較狼狽。
三重朱古力麻糬窩夫配朱古力雪糕 $84
呢款甜品絕對能得到朱古力魔歡心。窩夫外層烤得輕脆焦香，但中間原來隱藏住勁煙韌嘅麻糬，唔單止勁有韌度，仲有濃郁嘅朱古力香。窩夫上灑滿Oreo碎同大量朱古力醬，仲有大大個朱古力雪糕。雪糕除左朱古力仲食到棉花糖同果仁，應該係類似石板街嘅口味。用朱古力脆卷沾雪糕黎食，充滿童年回憶。
抹茶士多啤梨法式千層酥配士多啤梨雪糕 $82
千層酥上唧滿奶油，仲有大大粒士多啤梨點綴，糖霜灑喺酥皮上，高貴又精緻。輕輕切開酥皮，原來內藏抹茶醬。酥皮輕盈鬆化，牛油味香，酥而不膩。抹茶質感絲滑，帶著一絲甘苦，士多啤梨又新鮮又夠甜，多一份清爽。配搭嘅士多啤梨雪糕味道香濃，有天然嘅果香，不錯。
朱古力鮮奶咖啡 $44
有靚靚嘅拉花，表面可以見到輕柔嘅泡沫。咖啡嘅香氣散發出來，味道香純，加入牛奶令整體口感更加順滑，奶香味過後就飲得出微甜嘅朱古力味，平衡咖啡嘅苦味，品質相當高。
係舊區難得一見可以歇腳放鬆嘅小店，餐廳內放滿玩具、舊物，連枱椅都係舊時學校嘅產品，玩味十足。一班年青店員親切有禮，手法專業。食物有創意，賣相精緻吸睛，味道仲相當不錯。不錯的窩。
by admin 4 月 26, 2025 | Blog , 大圍 , 樓上cafe , 泰國菜
大圍田心村 26/4/2025 14:00
蔥油炭燒豬扒飯 $110
相信係小店嘅招牌菜之一：巨人蔥油炭燒豬扒飯。一上枱已經聞到陣陣嘅香茅香氣，豬扒簡直係巨量，兩大塊巨型嘅炭燒豬扒擺放喺雪白嘅香軟白飯上。炭火燒烤，表面烤得金黃微焦，油脂豐富。外層仍然保留香脆口感，豬扒中間嫩滑多汁，非常好味。再加上蔥油，加一份咸香味，送飯一流。
泰式雞絲濕炒河 $95
河粉上鋪滿雞絲，份量多到不得了。雞絲都幾嫩滑，啖啖肉，感覺好爽。河粉非常幼滑，煮到啱啱好。幾喜歡濕炒嘅做法帶多點醬汁，河粉吸收晒個醬汁。仲加上大量蔬菜，非常健康。
泰式拼盤 $128
將多款經典泰式小吃集於一碟，材料豐富，賣相非常吸引。香葉包雞雞肉嫩滑，滲出淡淡香葉香氣。蝦餅外層香脆，內裡蝦肉餡爽口彈牙，食得出的新鮮。魚餅有豐富魚肉鮮味，加上香茅同咖喱等香料作點綴，微辣度非常好味。雞翼煎得金黃微焦，調味鹹。素菜春卷香脆可口，餡料豐富。咁多款香口小食，一定要加一點酸辣醬，酸酸甜甜，非常好味。
餐廳雖然規模唔算大，裝潢簡約清新，充滿着泰式情懷。非常鍾意呢種家庭式嘅小店，氣氛輕鬆自在，份量十足，價錢又親民。
by admin 3 月 3, 2024 | Blog , 旺角 , 樓上cafe , 韓國菜
3/3/2024 12:00
今日出旺角，朋友介紹去旺角726大廈搵食，原來交通都幾方便，全座大樓都好多食肆。
揀咗呢一間非常之正宗嘅韓國餐廳，餐廳細細，坐梳化位都幾舒服。
店員先送相前菜三款，泡菜輕微辣，非常新鮮。大豆芽菜麻油味香，非常爽脆。
無骨芝士燉雞 $278
實在太豐富，一大盤嘅份量，足夠3至4人分享。材料豐富，無骨雞肉大大件，都好多舊，肉質其實有啲實。好彩仲有好多煮到入晒味嘅薯仔、紅蘿蔔等。最好味當然係索晒醬汁嘅冬粉，非常之滑溜。醬汁甜甜的，小朋友都好鍾意。選擇加芝士版實在冇揀錯，芝士勁厚，份量超多，咸鮮味十足。
牛肉紫菜包飯 $78
賣相討好，每件材料都好豐富。紫菜脆卜卜，有麻油香，包住飯、黃瓜、甜蛋等，牛肉應該用醬汁煮過，非常之香甜。
藍檸梳打 $32
藍色嘅飲品，大大杯，非常吸睛。檸檬本身都好新鮮，梳打微甜，正好解膩。
全餐感覺非常正宗，值得一試。但價錢略貴，未必會返轉頭。
